الهدف من اللعبة
عمان ديل لعبة ورق عائلية سريعة: كل لاعب بيجمع أراضي من أحياء عمان (عبدون، دابوق، الويبدة، جبل عمان…). أول لاعب بيكمّل 3 مجموعات أراضي كاملة بيربح. بالطريق بتجمع مصاري، بتطلب إيجار، وبتسرق وبتحرق أراضي أصحابك بكروت الأفعال.
أنواع الكروت
🏘️ كروت الأحياء (الأراضي)
12 حي من عمان. كل حي إله لون وعدد كروت لازم تجمعه عشان تكمل المجموعة (2 أو 3 أو 4 كروت). في كمان كروت مشتركة بوجهين (مثلاً خلدا/تلاع العلي) بتقلبها وبتستخدمها لأي حي من الاثنين.
💵 كروت الفلوس
من مليون لـ20 مليون دينار. بتحطها ببنكك وبتدفع منها الإيجارات والديون.
🎭 كروت الأفعال
92 كرت (52 نوع مختلف) بتقلب اللعبة: تسرق أرض ("خاوة"، "سلبطة")، تطلب مصاري ("كبة بلا بلا"، "نقطوني")، تحمي حالك ("حل عني"، "لا تقرب")، أو تبني شقة وفيلا على مجموعتك. شوف كل الكروت وشرحها.
👳 الشيخ (الجوكر)
بيعوّض عن أي أرض بأي مجموعة عندك. ما بينسرق إلا بكرت "جيب الشيخ جاي".
كيف تلعب — خطوة بخطوة
- التجهيز: اخلطوا الكروت ووزعوا 5 كروت لكل لاعب، والباقي بالنص كومة سحب.
- أول الدور: اسحب كرتين (أو 5 إذا إيدك فاضية).
- 3 حركات: بكل دور بتقدر تنزّل لحد 3 كروت: فلوس للبنك، أرض قدامك، أو كرت فعل تلعبه.
- كروت الأفعال: إذا لعبت كرت عالخصم، بيقدر يرد بكرت دفاع زي "حل عني" أو "اقلب وجهك".
- الدفع: إذا انطلب منك مصاري بتدفع من بنكك، وإذا ما كفّى بتدفع من أراضيك. ما في فكة.
- آخر الدور: ما بتضل معك أكثر من 7 كروت بإيدك.
- الفوز: أول واحد بيكمّل 3 مجموعات كاملة بيربح.
نصايح للفوز
- خلّي بالبنك مصاري دايماً — اللي ما معه مصاري بيدفع من أراضيه.
- احتفظ بـ"حل عني" لما حدا يحاول يسرق منك مجموعة كاملة بـ"يخلف عليك".
- ركّز على الأحياء يلي بتكمل بكرتين (دابوق، الهاشمي، الويبدة، صويلح) إذا بدك تخلص بسرعة.
- "شقة" و"فيلا" على مجموعة كاملة بيطلّعوا الإيجار لفوق — وبعدها "دبلها"!
أسئلة عن القوانين
كم لاعب بتنلعب عمان ديل؟
من 2 لـ6 لاعبين. أحلى إشي بين 3 و5 لاعبين.
قديش مدة اللعبة؟
حوالي 20 دقيقة للعبة العادية (3 مجموعات). بالتطبيق بتقدر تختار لعبة سريعة (مجموعتين) أو طويلة (4) أو ماراثون (5).
كم مجموعة لازم أكمّل عشان أربح؟
القاعدة العادية 3 مجموعات أراضي كاملة من ألوان مختلفة أو نفس اللون. بتقدروا تتفقوا على رقم ثاني قبل ما تبلشوا.
كم كرت بسحب كل دور؟
كرتين ببداية كل دور. وإذا إيدك فاضية تماماً بتسحب 5.
كم حركة بعمل بالدور؟
3 حركات: كل كرت بتنزّله (فلوس للبنك، أرض قدامك، أو كرت فعل) بيحسب حركة.
شو بصير إذا معي أكثر من 7 كروت؟
بآخر دورك لازم ترجع لـ7 كروت، والزيادة بتنرمى عالساحة.
بقدر آخذ الشيخ (الجوكر) من لاعب ثاني؟
بس بكرت "جيب الشيخ جاي". باقي كروت السرقة ما بتقرب على الشيخ، وما بتدفع فيه ديون.
في فكة لما أدفع؟
لأ — إذا دفعت ورقة أكبر من المطلوب ما بترجعلك فكة، إلا إذا معك كرت "هات الباقي".
شو الفرق بين عمان ديل ومونوبولي ديل؟
نفس روح لعبة الورق السريعة، بس عمان ديل أردنية بالكامل: أحياء عمان الحقيقية، 159 كرت، وكروت أفعال بالعامية الأردنية زي "خاوة" و"حل عني" و"نقطوني"، مع قوانين وكروت جديدة مش موجودة بالنسخة الأجنبية.
جرّب عمان ديل هلق — ببلاش
العب من المتصفح ضد الكمبيوتر أو أونلاين مع أصحابك، أو حمّل التطبيق على الآيفون. وإذا بدك الكرتونة الحقيقية: 15 دينار مع توصيل مجاني بعمان الغربية.